中環出更：葉振南貪靚 勤激光祛斑
時興醫學美容，執靚個樣見人。藍帶啤酒亞洲區總代理葉振南（Stephen）都熱衷「打斑」、「去皺」。無他，細佬葉振國開醫學美容中心，佢近水樓台，做facial統統唔使錢。
出名為食嘅Stephen，高峰期體重高達二百磅，行樓梯都氣喘喘，佢把心一橫跑步減肥，眨吓眼減走幾十磅。肚腩拜拜，睇落後生晒，拍埋廿來歲兒子葉家麟身邊，經常被人誤會係兩兄弟。
未使打去皺針
講到回春，Stephen承認貪靚，定期打激光，增加皮膚彈性，難怪面上連黑頭、暗瘡都無粒，正過唔少後生仔。但講到明星至愛嘅去皺針，佢就話未使住。
呢位潮爸，子女已成長，次女今年暑期喺英國大學畢業，帶四方帽嘞，舉家將會飛英國祝賀，然後直踩佛羅倫斯、米蘭shopping。囡囡畢業成績優異，仲獲名牌大學錄取做碩士生，抵獎喇。