政情：投票系統超負荷跪低
拉布戰踏入第十一日，三十幾位建制派議員將舉手同撳鐘投票呢兩個動作重複咗幾百次，有人講笑話，可能好快會因為肌肉勞損而投降。不過，尋日首先投降反而係立法會嘅投票系統。話說大約早上十點半鐘，一眾議員喺響鐘後發現投唔到票，搞到主席要宣布休會，秘書處檢查後發現投票系統出現故障，好彩淨係用咗五分鐘就搶修成功。
立法會新大樓入伙未夠一年事故頻生，理應會招致各方責難，但班被罰坐做投票機器嘅建制派議員就好理解今次事故，有議員話：「莫講話機器壞，連續坐咁耐人都壞啦！」到目前為止，仲有四百六十二項修訂要留待下周三繼續表決，秘書長吳文華（Pauline）有信心下星期五早上可以完成三讀。
面對餘下咁多修訂要表決，工聯會王國興就要求主席將餘下四百幾項修訂合併表決。但主席話呢個要求只可以由動議者、即人民力量黃毓民提出，當然毓民一口拒絕啦！