唉，原來官地咁鬼死容易侵佔，可能好多人後悔一早冇跟風走去生人霸死地，否則家陣做咗地主啦！
唔係講笑o架，侵佔官地確係冇乜難度，好似元朗大棠荔枝山莊咁吖，土豪劣紳一霸就霸咗十八年，如果唔係審計署踢爆，懵到上心口嘅地政總署都唔知發生乜嘢事。其他例子仲有好多o架，今日同大家集中講一單新鮮個案。
元朗有一個地方叫做白泥，一向以風景優美見稱，吸引大量攝影發燒友遠道而來，白泥日落係龍友趨之若鶩嘅永恒題材。之不過咁，白泥有一個面積一萬三千平方呎嘅燒烤場，最近竟然被夷為平地，並且以鐵絲網圍封，大殺風景之至。
圍封燒烤場搞乜東東呀？即係咁，咪又係生人霸死地囉，當地已經淪為私人墓園嘞，裏面建有山墳超過十五座，四十幾個金塔，部分山墳更加未刻上姓名，證明侵佔官地係不久之前嘅事，並非咸豐年代遺留落嚟嘅歷史問題。
本報記者收到風有件咁嘅事，當然發揮第四權監察作用，向地政總署問個清楚明白啦。哈，奇就奇在官老爺發雞盲，話官地之內多個山墳屬於一九八三年七月之前建成嘅祖墳，除非有發展需要，否則不會清拆。署方只係證實，涉事官地的而且確係非法圍封佔用，當局已按法例張貼告示，着令相關人士停止佔用並拆除圍網。
喂，記者實地視察過o架，除咗無名無姓嘅疑似吉墳之外，部分山墳嘅立碑日期介乎二○○○至○八年之間，點算係祖墳呀，傻蛋！
所以咯喎，立法會議員陳淑莊狠批署方態度軟弱散漫，批得一啲都冇錯。陳議員又擔心政府變相縱容，導致類似嘅僭建山墳愈建愈多，要求果斷執法，盡快加強打擊。
講來講去，一日最衰都係「特衰正苦」冇鬼用，一大班低能高官害到香港人做鬼都唔靈。唔係咩？祖宗山墳骨灰龕位長期渴市，想死又唔敢死，想葬又冇得葬，立心不良嘅土豪劣紳咪睇好呢條水囉，呢度違規設置骨灰龕場，嗰度非法圍封私人墓園，一於大發死人財。莫講話左鄰右里覺得大吉利是，成個香港遲早變成亂葬崗！
至於僭建呢家嘢，講真吖，有時又唔怪得晒不法分子為非作歹，鬼叫曾蔭權班子以身作則教壞細路咩。特首又僭建，司長又僭建，局長都僭建，連平時淨係識得唱歌仔獻世嘅食衞局局長周一嶽都加入僭建黨，民間人士自然唔執輸有樣學樣啦。
既然地政總署發雞盲，僭建山墳絕對不艱難，功夫茶真係有少少擔心，禮賓府主人有朝一日瞓醒覺擘大對眼，咦，點解下亞厘畢道忽然之間多咗幾座山墳o架，啋！