候任特首梁振英頻頻落區，日前佢訪問青衣一個中產家庭，戶主劉太兒媳月入成五萬，都話「買唔起私樓」，結婚多年仍未能搬開居住。事實的確如此，貪曾在任七年，樓價一味狂奔，唔好話藍籌屋苑升到離晒罩，即使一般所謂上車盤，三百零呎都去到二百幾三百萬，阿哥，一般打工仔試問有乜可能置業興家？
嗱！政府資料顯示，二○○○年本港家庭平均月入萬八蚊，十二年後的二○一一年底，收入僅增一成至兩萬元，期間樓價升幅快過火箭。中產買唔起樓，正常過正常！
CY上任初期可謂「百廢待興」，樓價高企與住屋問題，無疑最為迫切。佢透露，會在上任後短時間內推出解決青年住屋問題的政策，以免更多本港青年要「一世住公屋」。老朽則認為，能夠「一世住公屋」，未嘗不是好事，事關如今之公屋愈起愈靚，青年有公屋住，點都好過住貴劏房啩？一啲基層甚至踎喺籠屋，改善基層居住環境迫在眉睫，考驗CY上任初期是否積極進取，關注民生福澤！
奧地利作家茨威格的小說《象棋的故事》，寫一個對象棋無特別愛好的B博士，被蓋世太保抓到集中營，一天二十四小時都係面壁。後因一個機會得到一本棋譜，他便瘋狂地鑽研起來，日夜在腦子裏與自己鏖戰，結果患上了「象棋狂熱症」。事實是居住環境惡劣，除了涉及人的尊嚴，也影響人的性格，文明香港，CY有必要先廢除籠屋。