政情：餐飲聯聘文員似請AO
依家搵食艱難，做一個文員原來都唔簡單，分分鐘要好似大學畢業寫論文先肯請，講緊係由黃家和（Simon）做會長嘅香港餐飲聯業協會（餐飲聯）。我哋尋日收到讀者一封電郵，內容係分享佢老友嘅「求職怪事」，話說佢老友去咗餐飲聯應徵做「項目助理文員」，明明入職只需要中五程度，但點知面試後要寫兩篇十足論文嘅中英文致謝辭及邀請信。
面試寫中英「論文」
有關致謝辭及邀請信係畀特首同食環署署長，要分析過去三十年飲食界同政府合作嘅環保項目計劃嘅成果及得失。呢位讀者質疑，你估依家考政務官（AO）咩，難度咁高，至少要有關於環保生態學術研究嘅碩士或博士學位先應付到。此外，呢份工仲要識網頁設計、網頁編寫技能。就係咁，呢位讀者嘅老友惟有放棄申請，白走一趟。
咁奇異嘅招聘，我哋當然要問番會長黃家和啦，但佢就話好少過問餐飲聯請人嘅事，因為全部由人事部負責喎，佢亦唔方便去干預部門用乜嘢準則請人。不過，佢話會返去了解事件，如果發現要求過高，可能會建議降低招聘要求喎。