政情：鬍鬚曾訪台 國民黨捱轟
財爺鬍鬚曾訪台鬧劇陸續有來，先有齋講廣東話唔講國語玩殘當地記者，前日又累到一班向佢抗議嘅香港留學生畀保安打傷。原來傷人事件仲有手尾跟，有關事件尋日發展到成為台灣在野民進黨攻擊執政國民黨嘅政治工具，諗唔到鬍鬚曾未搞好港台關係，就先為對方添煩添亂？
成民進黨攻擊工具
前日有多名喺台灣大學讀書嘅香港留學生想向鬍鬚曾抗議，期間同在場保安爆發多輪衝突，有學生身體多處受傷。
民進黨代理主席陳菊尋日就咬住呢單嘢大做文章，發表聲明狠批國民黨政府嘅處事手法，認為事件讓台灣民主蒙羞，話「使台灣這塊民主淨土出現違反人權的租界」。
鬍鬚曾累人累物事迹不僅如此，據聞台灣有關部門原本有意畀傳媒公開採訪佢嘅拜會行程，但鬍鬚曾疑似自知難登要講國語嘅場面而要求低調，台方惟有臨時取消已發布嘅公開行程。鬍鬚曾短短幾日行程搞到人哋麻煩多多，真係唔去好過去啦！