政情：政制局防流會 靠索AO箍議員
政府堅決唔肯收回出缺草案，由得建制派老弱殘兵對抗泛民主派議員拉布戰，仲使出一招美人計，尋日派出共四十人「狗仔隊」，全天候看守立法會大樓每一角落， （目及）實建制派議員出入，防止流會。政制及內地事務局局長譚志源（Raymond）特別介紹咗幾位靚女政務主任（AO），仲話「佢哋全部出道幾年咋，夠晒青春呀！」副局長黃靜文直言，要靠班靚女睇實啲議員。
Raymond尋日無喇喇喺會議廳外走廊介紹幾位青春少女少男畀記者認識，原來係負責點議員人數嘅AO同行政主任（EO）。其中一位姓鍾嘅AO的確幾省鏡又標致，長頭髮眼大大，皮膚白裏透紅，符合晒時下年輕人嘅「女神」規格。除咗夠靚外，佢仲夠大方淡定，畀記者包圍下仍然企定定答問題，話自己嚟自財經事務及庫務局，大學畢業後就做咗兩年AO。
不過，呢位靚女都有缺點，就係口脗似足「人肉錄音機」政務司司長林瑞麟，一問到佢擔唔擔心流會時，佢就自動波話立法會係議員開會嘅地方，相信佢同市民都唔想見到流會出現喎。至於其他AO，靚唔靚就見仁見智，但肯定嘅係夠晒青春，全部都係做咗三年未夠。黃靜文就話，雖然佢哋年輕，但大部分做過政制局或行政署，對六十個議員都有認識，唔怕認錯人喎。
40人狗仔隊分三更看守
黃靜文又自爆，呢批AO同EO由行政署負責抽調，從各個政策局揀蟀，一共派出四十人分別負責早、晚、通宵三更，通頂呢啲粗重工夫全部由男丁負責，一班美女就專責守住中午。佢仲講笑話，如果夜晚都擺下美女陣，分分鐘驚議員掛住望靚女，趕唔切返議事廳投票喎，夜麻麻往往係人集中力最低之時，黃靜文呢一點都諗埋，莫非佢睇死班議員嘅定力唔夠？