中環出更：陳振彬趁平自駕遊歐洲
歐洲經濟吹淡風，連帶歐元匯價都回落，令到唔少人嘅歐遊預算都鬆動咗，好似觀塘區議會主席陳振彬（Bunny）就計劃嚟緊暑假去歐洲自駕遊。Bunny話，今次歐遊旅程會先到德國探朋友，然後由德國慕尼黑起步自駕遊，一直開到奧地利、瑞士及意大利，沿途觀賞阿爾卑斯山嘅湖光山色，認真寫意。
指歐元不宜炒賣
因為生意往來，Bunny喺德國有好多老友，佢話當地人對於沒完沒了嘅歐債危機感到厭煩，認為希臘多次受援助卻了無起色，真係無可救藥，所以畀希臘離開歐元區嘅主張，喺歐洲愈來愈有市場，當地銀行亦已經有晒準備喎。正因為前景不明朗，Bunny話買歐元只宜應付旅遊開支，炒賣就萬萬不可。