中環出更：飲食達人炒熱明火廚神賽
兩年一度嘅亞洲飲食界盛事「明火廚神．國際挑戰賽」即將舉行，尋日喺中華廚藝學院舉行發布會，多位飲食界武林高手雲集，好似「阿一鮑魚」楊貫一（一哥）、星級名廚周中等，仲有飲食達人余健志（Jacky）、私房菜達人Ricky Cheung等即場示範星級美食，無論視覺或味蕾都極盡享受。
Jacky親手炮製一味「富貴牡丹鮑魚」，以南非鮮鮑切片砌成花形，並以日本清酒及雞湯調味，一哥食過都讚啲鮑魚滑過河粉。Ricky Cheung則創出一道「五味帶子他他」，賣相味道俱佳。同場仲有號稱「至尊刀神」嘅大廚黃君即場表演，將桂花魚起骨成松鼠魚，只需一分七秒，令人嘆為觀止。
一哥話，煮一道菜除咗味道要好，仲要講究刀章，切得厚薄均勻，可以將美味推上巔峰。周中就笑笑口叫大家唔好將精湛廚藝收收埋埋，應該公諸於世，一齊將中菜發揚光大，同時激勵年輕人入行。
龐愛蘭碎花裙晒女人味
卓妮仲見到沙田區議員龐愛蘭（Scarlett），佢穿上Cynthia Steffe紫色碎花裙，夏日感爆燈。佢笑言，嚟煮嘢食嘅場合，梗係要着得女人啲，配合番女性入得廚房嘅形象嘛！Scarlett話自己鍾意入廚，仲參加過上一屆「明火廚神」，做出一道難度高嘅「反沙豆腐」添。
卓妮