點蟲蟲，蟲蟲飛！
如果蟲蟲係蝴蝶，飛入花叢草皮就話賞心悅目啫，萬一蟲蟲係曱甴，一飛就飛入你個飯盒，睇怕你隔夜飯都嘔番出嚟。曱甴呢家嘢，相信係地球上體積最細但係又有最大驚嚇能力嘅昆蟲，莫講話嬌滴滴大小姐會嚇到花容失色，眼耳口鼻隨時跌晒落地，即使男人老狗好多都患有「蟑螂恐懼症」，一見到曱甴就會發軟蹄兼叫救命。
好衰唔衰，美心集團旗下食肆懷疑係「曱甴飯盒供應商」，一次又一次免費加料送蟲蟲，唔食死你都嚇鬼死你！
呢嗱嗱嗱，美心旗下有一條專門供應全港多間中小學嘅「原美牌」飯盒生產線，市場佔有率兩成以上㗎，好多傳統名校都係客仔。其中一個客仔係聖公會聖雅各小學，半年之內至少四次發現原美牌飯盒內藏異物，今個月更加有一次見到汁液之中有昆蟲。到底係乜嘢昆蟲呢？校內盛傳，正正就係人見人怕、鬼見鬼愁、神見神憎嘅曱甴！
由於原美牌飯盒質素冇因為校方不斷反映意見而改善，聖公會聖雅各小學決定終止合約，以免小朋友病從口入。怒炒曱甴飯盒供應商固然係比較安全嘅自保行為，煩就煩在學生哥覓食困難，其中一個家長訴苦：「由依家到七月，一係繼續要仔女捱美心（原美）飯盒，一係家長帶飯到學校，煩死人！」
講真吖，外號小強嘅曱甴，可能係最似外星怪獸嘅地球生物，趕之不盡，殺之不絕，數量比起中國同香港嘅貪腐官僚仲要多，真係好討厭o架。點解堂堂一個美心集團，居然容許旗下食肆有曱甴出現嘅呢？如果你話神州大地氾濫成災嘅黑心食品係貪官包庇縱容所致，功夫茶就認為，香港嘅邋遢飯盒係處罰不嚴嘅惡果。
睇下美心集團嘅前科吖，曾經有九十二項違反《公眾衞生及市政條例》嘅定罪紀錄。只計今年，美心至少被法庭處罰三次，大家估下有乜嘢懲戒吖嗱？答案係合共罰款七千六百元。
喂，大老爺，三次違例都係合共罰款區區幾千銀，簡直雞碎咁多，試問對於一個大集團有乜嘢阻嚇作用呀？其中一單案例係話，有食客去年六月於沙田禾輋商場美心MX分店購買低糖凍綠茶，飲用期間發現口含蟑螂，法官講到明令人厭惡，之但係罰款只不過三千元咋，求其搵一個美心小職員都賠得起啦，大老闆當然覺得不痛不癢。
即係咁，治亂世必須用重典，大老爺唔用重典咯喎，莫講話蟲蟲飛，連奸商都會飛，呢家嘢叫做姑息養奸。
既然美心飯盒點蟲蟲，執法同司法官僚就唔可以再姑息，否則以後真係有機會食死人o架！