廣州再發生廢除粵語風波；話說廣州冼村小學校長鄭蕙，以「講粵語的都是低素質的（表現）」為由，強制禁止師生在校內和校外集體活動使用粵語，否則會被全校通報批評。
猶幸如今已非文革時代，百姓並沒有被培養成了工具，對真善美和假惡醜仍有判斷力。有關消息在當地民眾中引發極大回響，不少人上網怒轟校方專橫獨斷，推行洗腦教育，不尊重地方風俗文化，有違憲法保障的公民權利。有網民呼籲發起新一輪省港澳「粵語保衞戰」，老朽舉腳贊成！
粵語有不可替代的生命力，雖失之俚俗，然嬉笑怒罵、寓莊於諧、抵死過癮，好像：失失慌、害街坊；面懵懵、當老馮；笑騎騎、放毒蛇；唔想衰、埋大堆；唔夠班、執二攤；起大屋、靠表叔；二三線、好難變；趁你病、撻你訂……呢啲粵語三字經，好多只可意會不能言傳！
老朽近讀黃坤堯教授論文《廖恩燾「廣東俗話七律詩」與詩律探索》，知有不少精讀中西語文者，一樣好方言文學，廖恩燾係其中之一，佢有不少粵語七律詩，影射政壇人事，好似：大家都為兩蚊錢，半句唔啱嗌定先。墨盒掟穿成額血，茶杯打爛幾牙煙……讀之令人失笑，家陣時興「拉布」，墨盒唔會亂飛，好像王國興咁用來寫大字，變身「立會曾灶財」，幾過癮搞笑！
跑完野馬，言歸正傳，老朽都係嗰句：提倡普通話，不必用暴力扼殺粵語，否則老朽會請佢食老味！
施友朋