立法會選舉臨近，各大政黨不約而同全方位照顧市民嘅衣食住行需要，明眼人一睇就知想博取選民好感。其中新界社團聯會副理事長陳克勤，如無意外會首次喺新界東直選擔大旗領軍，為咗鞏固同開拓票源，近期四出同各方老友記打好關係。有網民仲發現佢聯同社團組織喺大埔派愛心米，原本派米無乜問題，但克勤仔嘅合作夥伴竟然係惠州社團總會及惠州新動力。
克勤仔係福建人，但點解會同惠州社團合作呢？莫非佢搵到新票源？原來佢係惠州市政協，所以先至會有今次合作派米。克勤仔話，每包愛心米只係半公斤，只係對長者街坊嘅小小心意喎。
之前有傳克勤仔選情只係五五波，但最近有講法話佢嘅形勢已經好穩陣，反而打算同區參選嘅兩位女將龐愛蘭同葛珮帆就勢均力敵，分分鐘兩人爭爭吓令漁人得利都有之喎。