政情：田二少教鄉紳改善形象
鄉議局因新界村屋僭建問題同夕陽政府搞到面紅耳赤，部分鄉紳之前將矛頭直指鐵腕執法嘅發展局局長林鄭月娥，仲火燒林鄭嘅公仔表達不滿，事後令好多市民對班鄉紳好反感。唔知鄉議局係咪睇番轉頭都知衰，決定搵局內顧問、經營時裝品牌嘅田北辰教鄉紳改善形象。不過，田二少以前做九鐵主席嘅形象被指麻麻哋，睇怕佢都係「泥菩薩過江」，自身難保。
鄉議局舉辦嘅講座系列喺本月廿六日舉行，頭炮主題係「形象規劃與待人接物」，並由田二少同著名時裝設計師文禮賢做主講嘉賓。眾所周知，田二少嘅時裝品牌老中青都有捧場客，唔知佢啲時裝着咗喺班鄉紳身上會有乜效果呢？不過，即使改善咗外表，但內涵同品性唔係一朝一夕咁易改到，睇嚟鄉議局應該請多個禮儀顧問教吓班鄉紳先至得。
其實鄉議局近年不斷鼓吹要「文明」辦事，以專業理性態度應對政府嘅鄉郊政策，原本推行得幾好，點知僭建風暴又令鄉紳要「公民抗命」同「流血革命」，睇嚟鄉紳最終都係要按情況做斯文人喇。