政情：聶德權領導部門靠「服侍」
閱讀可以令人靜下來同自我反省，所以好多高官都有睇書嘅習慣。社會福利署署長聶德權都鍾情閱讀，佢認為閱讀可令人有無限嘅想像空間去縱橫馳騁，而影響佢最大嘅就係聖經。聶德權接受新地《讀好書》月刊訪問時話，佢從前事事講求效率，不在意人際關係，但入大學及信主後，改變咗佢嘅人生觀及價值觀，仲學識以服侍心態去領導部門。
聶德權話，從領袖角度嚟睇，有人覺得耶穌並唔成功，因為佢所帶領嘅十二門徒都離去，但佢認為當中嘅影響力不在於權力輕重，而係在於態度，用一種服侍心態去領導，呢種僕人式領導（Servant Leadership）嘅概念喺現今管理學係經常提到。佢仲趁機會推介咗幾本好書，當中包括日本漫畫《深夜食堂》，故事講述不同背景人士喺食堂發生嘅生活故事，同佢現時喺社署嘅工作不謀而合。