政情：高錕練寫書法勁投入
年前患上老年癡呆症嘅「光纖之父」、諾貝爾物理學獎得主高錕教授，日前同太太黃美芸到訪仁濟醫院屬下老年癡呆症服務單位「嚴徐玉珊卓智中心」。高教授喺職業治療師嘅指導下，體驗專為老年癡呆症患者提供嘅認知及導向訓練，包括參與做早操同寫書法活動，佢表現得十分投入同專注，就連高太都話好耐都未見過高教授喺新環境下表現得咁快樂喎。
高錕夫婦喺仁濟副主席嚴徐玉珊及蘇陳偉香等人陪同下參觀中心，親自體驗及了解中心嘅服務，高太大讚中心環境布置得好有家庭感覺，令病患者倍覺溫暖同舒適。身為高錕慈善基金會主席嘅高太仲話期待同仁濟就老年癡呆症服務嘅協作及發展作進一步探討添。為答謝高教授到訪，中心向高氏夫婦送贈一對由中心長者會員製作嘅天鵝擺設，寓意佢哋同德同心、笙磬同音。