政情：建制派焗通宵陪拉布
立法會「拉布」戰今日再度上演，過去兩星期經歷過流會後，據聞有人暗中出手催逼建制派議員諗橋「剪布」，但最終都係無計可施，唯一辦法就係焗住今晚通宵開夜車陪玩拉布，期望盡快拉完通過出缺安排。民建聯、工聯會呢啲堅實建制派對通宵開會誓死相隨，唯獨「五散人」林大輝及「怪醫」梁家騮反對通宵開會，大輝更慨嘆開通宵等於「癲鳳鬥狂龍，一鑊熟」。
原來立法會秘書處前日靜靜雞諮詢所有議員，了解佢哋嚟緊幾日邊啲時段得閒開會，目的擺明係想就通宵開會做好準備。到咗尋日傍晚終於有結果，立法會主席曾鈺成宣布，鑑於約有三十三位議員贊成開夜車，所以決定今晚通宵開會。不過，佢亦考慮到發動拉布嘅人民力量同埋社民連反對開通宵，所以除咗食飯時間休戰外，通宵期間都會喺適當時間放小息。
怪醫擰晒頭 十點鐘鬆人
至於已答應通宵陪玩拉布嘅建制派議員已做好準備，好似工聯會王國興，一邊鬧爆通宵開會係「自殘體力」，但一邊又因為網民對佢寫嘅毛筆大字報感興趣而興奮，所以今日佢會帶備九宮格紙、毛筆同墨繼續寫，而且仲準備畫有關拉布嘅漫畫故事，為漫漫長夜解悶。至於「五散人」陳健波就話帶定鬧鐘，慎防自己小息期間瞓過龍。旅遊界謝偉俊就預備輕裝上陣，帶備文件做嘢。
不過，另一散人林大輝同梁家騮對通宵擰晒頭。大輝話通宵等於「飲砒霜、玉石俱焚、兩敗俱傷、唔理智、唔理性，解決唔到問題」，仲話市民都唔想見到立法會上演「癲鳳鬥狂龍、一鑊熟」嘅做法，跟住反過來勸政府、拉布嘅議員同支持通宵嘅建制派議員坐低傾吓。至於怪醫就講明，今晚大約十點鐘就鬆人，總之唔會陪大家癲喎。
泛民方面，人民力量黃毓民尋日就呼籲支持者喺今日下午四點開始去立法會通宵聲援佢哋，仲話佢哋訂場訂到星期五晚十點鐘，必要時再申請延長集會時間。相信今晚立法會愈夜愈精彩。