中環出更：圓青年求婚夢
求婚係神聖時刻，唔少男士都渴望為愛人送上有咁大得咁大嘅鑽石戒指，以證明自己嘅誠意，但大粒鑽石唔係個個買得起。My Jewelry愛飾珠寶老闆何光耀（Mark）為咗幫蜜運中嘅男女圓夢，年前喺紅磡開咗間樓上舖賣超值鑽飾，專攻年輕人市場，唔少男士都買到大大粒鑽石去求婚。
Mark話，年前有見舖租人工係咁升，決定將分店由二十間縮至八間，其中紅磡工廠大廈內嘅GIA鑽石展覽中心，賣嘅鑽石比市價平一截。Mark解釋，佢係套用地產公司嘅營運模式，做鑽石供應商同顧客嘅「中間人」，只賺百分之四至五盈利。雖然賺少啲，但大受歡迎，營業額狂升。
開發智能App教揀靚貨
佢話，一粒成本十萬元嘅鑽石，市價就要賣到二十萬，但該店嘅售價就平一大截，貼近成本價。根據Mark嘅分析，男女客人有不同心理，男士較理性，喜歡物有所值，多幫襯樓上舖，而女性則較感性，鍾意即興購物，所以會光顧門市。問佢怕唔怕同行話佢頂爛市？佢就話有得必有失，自己問心無愧就得喇！
與時俱進嘅Mark去年仲開發咗個智能手機應用程式（App），入面有晒每粒鑽石嘅證書及國際市場價格，仲教大家點揀靚鑽石，唔少顧客同行家都爭住下載添！
卓妮