中環出更：蘇頌輝樂做禮儀先生

自小訓練有素

「禮儀顧問」呢個行業喺香港好冷門，畢業於美國名校普林斯頓大學嘅Desmond，卻為咗興趣膽粗粗入行。Desmond自小跟媽咪去Ball，加上在投資銀行工作，見盡富商巨賈，令佢訓練有素，舉手投足風度翩翩。

Desmond話，不論係傾生意、面試、約會異性等，統統講究禮儀。佢直言唔少人見工時愛着黑西裝，以為夠穩重，其實係着錯衫；佢又睇唔慣內地豪客喺高級餐廳「徒手」揸住牛扒大吃大喝，實在太失禮。佢於是帶頭推廣禮儀，開班由餐桌禮儀、談吐技巧等講起，獲幾間大專院校邀請開班授課，亦擔任大企業培訓導師，近年仲擔任電視台節目主持，講飲、講食、講生活品味。

叫Desmond評吓政圈中邊個最有禮，佢毫不猶豫話：「林鄭月娥」，佢大讚娥姐自信、淡定、說話言之有物，好有大將風範喎。

卓妮