立法會反對派議員展開拉布戰，利用千幾項動議拖延立法程序，有人認為係為勢所逼，有人覺得係浪費青春，搞到建制派議員唔係寫書法打發時間，就係索性瞌埋雙眼大覺瞓。如果你以為只有議員先至識得玩拉布，大錯特錯嘞，事關拉布專家大有人在，路政署就係其中一個佼佼者。
路政署點樣拉布呢？話說西環正街一帶環境十分陡峭，部分路段傾斜四十五度咁勁，街坊街里上上落落吃力萬分。為咗方便途人，運輸署決定興建扶手電梯，預計每日使用者二萬人次。大家估下決定嘅時間係邊一年吖嗱？唔係舊年，唔係前年，唔係大前年，而係香港回歸偉大祖國嘅一九九七！
講到呢度，相信大家都知道功夫茶想講乜。負責協調正街扶手電梯工程嘅路政署係一個拉布專家，一拉就拉足十五年。相對而言，議員拉布小兒科咋，喺官僚主義嘅龜速表現之前，絕對要甘拜下風。
全長八十五米嘅正街扶手電梯，一拖再拖要延至○九年先至動工。動工之後又唔見得進度良好，單係移走其中一段煤氣管已經用咗接近一年時間。邊個咁阻頭阻勢呀？咪就係路政署囉，據了解喎，工程承建商一旦有需要搬喉管，必須先停工上報路政署，代為安排相關機構到場視察再決定，即使移動四段喉管涉及同一機構，亦要分四次處理。
根據原本設計，正街扶手電梯係有四條嘅，家陣先至安裝咗一條咁大把，其餘三條影都未見。難怪有區議員狠批呢一項工程係「中西區之恥」。
大家都知啦，任何工程延誤少不免要增加成本，因為建築材料價格不斷上升吖嘛。電梯工程○八年預計三千幾萬元，○九年增至五千幾萬，今年就調整到六千萬，每米電梯成本高達七十萬，你都咪話唔浪費公帑！
嘥錢固然係一個問題，更加傷腦筋嘅係，沙塵滾滾完工無期嘅情況令到商戶生意大減，正在遭受慢性謀殺嘅酷刑。
所以話啫，官僚主義永遠害人不淺，人哋西班牙聖家教堂咁複雜就話興建一百年都未完工啫，正街扶手電梯有乜嘢咁巴閉呀？居然十五年都未成事，路政署成班拉布專家真係應該捉去打屁股。
有人覺得，如果議員日後餐餐都展開拉布戰，香港必定會癱瘓。計功夫茶話齋，官場龜速動物玩拉布嘅危機係冇乜分別㗎咋，同樣會令到香港陷於癱瘓嘅殘廢局面。
路署拉布十五年，正街電梯恨綿綿，有乜辦法改善呢？咁講啦，下屆政府唔好拉布，快刀斬亂麻踢走所有阻頭阻勢大笨蛋！