有人說：一個好社會嘅標誌係除了規則，一切都是零；一個壞社會嘅標誌係一切規則都是零！夕陽政府喺貪曾縮骨管治下，上下交相僭建，無法無天到最後一分一秒！自貪曾被本報獨家踢爆其名下物業露台僭建，惟事發近一年，睇怕啲高官都醒水啦，誰知食衞局局長周一鑊又被本報踢爆其位於港島嘅豪宅有僭建，原屬開放式嘅露台完全圍封，上樑不正下樑歪，學生哥作文又多一個好例子！
周一鑊，衰多鑊，其實都唔係乜新聞，所謂蚤多不癢，當衰多鑊已成家常便飯，衰親都鑊鑊新鮮鑊鑊甘，一日唔孭鑊，肯定周身痕！《孔子家語》話齋：「所謂庸人者，心不存慎終之規，口不吐訓格之言，不擇賢以託其身，不力行以自定，見小闇大，而不知所務……」尤其「見小闇大，而不知所務」，正正是周一鑊渾渾噩噩嘅寫照，闇（音「暗」），即昏昧也；意思係講一個庸人對小事看得仔細，對大事卻昏昧糊塗，而且也不知道自己應當致力於何事。
呢兩句話可以講真正為周一鑊度身訂造，喺佢管轄下，食物、藥物、醫療頻頻出事；大事糊塗，一味喺小事上「吹毛求疵」，完全不知所謂！猶幸你孭鑊到最後一分一秒，廢柴形象鮮明，令人「忘不了你」！嗱！唔好學禿鷹曾偉雄錯咗就向前看，僭建咗就僭建咗，拆去圍欄係不切實際！回頭是岸，還香港一點法治，一點規則，總算納稅人沒有白養你！阿彌陀佛！