政情：發叔見完CY 領導人上身
新界僭建問題至今仍未解決，對下屆政府嚟講，絕對係一個大炸彈。所以候任特首梁振英（CY）尋日都會一會鄉議局主席劉皇發，聽下發叔對僭建問題有咩高見。點知發叔會後領導人上身，建議CY以「求和諧、求發展」態度去處理僭建問題。唔通拆建築物就係唔和諧，僭建多啲就係有發展？
發叔尋日下晝去候任辦見CY，傾完一粒鐘後佢同記者講，話解決僭建問題除咗要「求和諧、求發展」外，仲要「軟着陸」喎，簡直係將領導人口號琅琅上口，不過問發叔咩叫「軟着陸」，佢又答得好軟，無任何堅實同具體嘅回應。尋日去探CY嘅仲有特首辦主任梁卓偉同立法會議員梁耀忠，全都無透露同CY傾乜。
近日嘅氣溫升到超過卅度，舊政府總部西座十二樓嘅候任特首辦可能冷氣唔夠，尋日一次過搬咗四把座地風扇上去，轉頭又嫌太多，有一、兩把又搬番走。不過CY埋頭籌組新政府，都唔理熱唔熱，尋日做到六、七點至返屋企食飯。