本港醫療系統千瘡百孔，烏煙瘴氣，亂象叢生，搞到事故頻頻，民怨沸騰，究竟點樣先至可以撥亂反正呢？
盛傳將會接任食衞局局長嘅高永文認為，下屆政府必須改善公、私營醫療服務質素及發展問題，縮短公立醫院病人輪候時間、解決醫護人員工作量過大及人手不足等問題，而私家醫院亦需要增加收費透明度咁話。
嗱，中醫診病講求望聞問切，西醫其實都差唔多嘅咋，要治理本港醫療亂象，首先就要望聞問切，然後先至可以對症下藥。高永文強調要縮短公立醫院病人輪候時間、解決醫護人員工作量過大及人手不足，無疑已經睇到問題所在，但應該點樣解決，點樣醫治，佢似乎仲未搵到藥方，淨係話公立醫院可以聘請退休醫生及私家醫生幫手喎。
正所謂，有因才有果。無論係醫護人員工作量過大，或者病人輪候時間過長，都係因為前線人手不足；而前線人手不足，主要因為醫管局管理混亂，資源分配不當。所以，要解決呢啲問題，關鍵係要徹底整頓醫管局，只要將公立醫院管理納入正軌，公平合理分配資源，其他問題自然迎刃而解，否則，就算聘請幾多退休醫生及私家醫生都止唔到咳。
眾所周知，香港唔係缺少醫生，而係公立醫院吸引唔到人才；醫管局更加唔係缺錢，而係用不得其所。近年港府醫療開支不斷增加，但好多錢既唔係用喺病人身上，亦唔係用喺前線人員身上，而係用嚟養醫管局嗰班高薪厚祿嘅管理層，佢哋個個年薪幾百萬，行政費蠶食咗唔少醫療經費，搞到前線資源不足，十個煲得七個蓋，喺咁嘅情況下，服務質素自然每況愈下，病人輪候時間愈嚟愈長不特止，醫療事故更加無日無之。正如高永文話齋，病人睇專科，閒閒哋輪候半年至九個月，如果需要做手術，更加隨時要等兩三年。你話喇，人生究竟有幾多個三年吖？
最荒謬嘅係，前線醫護工時長，壓力大，個個已經做到氣咳，當局唔諗辦法解決，反而大肆吹噓所謂醫療產業，變相鼓勵雙非孕婦嚟港產子，結果除咗逼爆公立醫院產房，私家醫院仲不斷挖角，導致人手不足問題愈演愈烈。
講到底，醫管局唔整頓，庸官唔清除，醫療亂象就無法改善。嗱，承諾「穩中求變、適度有為」嘅新政府就快上場喇，佢哋究竟有冇決心解決問題，可唔可以對症下藥，大家不妨拭目以待，希望唔好再令市民失望喇！