香港電台前副廣播處長梁松泰（Gordon）離開咗港台個幾月，尋日以政制及內地事務局副秘書長身份重返港台做節目，順便呼籲市民登記做選民。節目上有青年朋友就香港選民登記率低及爆出種票醜聞等問題圍質佢，不過Gordon都係答埋啲行貨答案。最離譜係有人建議佢走去大專院校宣傳，吸引啲啱啱夠十八歲嘅後生仔登記，佢竟然答好難假設十八歲以上嘅市民都已經登記晒，完全九唔搭八。
本身係政務官嘅Gordon，○九年「空降」港台出任副廣播處長，做咗三年就升職做政制局副秘書長。Gordon尋日重返港台，由老細變身受訪者，出席同一節目嘅青年人不斷向佢投訴香港嘅選民登記制度。
有青年投訴選舉事務處發畀市民嘅信件中文勁差，一般市民好難睇得明，又問佢有乜好橋減少種票行為等，但Gordon都係答埋啲咩「虛報住址係犯法」等行貨答案，莫非佢想承繼即將離開政府嘅政務司司長林瑞麟，做新一代「人肉錄音機」？