政情：郎朗獲殊榮 分享大師心得
國際著名華裔鋼琴家郎朗豐厚嘅威水史，最近又多一單！前日佢獲美國最大嘅私人音樂學院、有九十四年歷史嘅曼哈頓音樂學院頒授榮譽博士學位，表揚佢喺藝術、慈善同教育領域嘅貢獻，佢亦係首位獲該學院頒授榮譽博士嘅亞裔人，認真巴閉。郎朗亦十分慷慨，向學院畢業生分享佢嘅大師心得。
郎朗前日喺頒授儀式上，向學院嘅三百四十位畢業生傳授佢嘅七大成功秘訣，包括一定要保持樂觀心態；必須每朝早練習，確保每個音節都演奏準確；要隨時準備好一啲保留曲目，以便臨時表演或面試嘅時候演奏；喺專注苦練音樂之餘，亦要學番啲文學同藝術；要將個人感情同音樂合二為一，先可以更好地理解音樂；多啲同同伴一齊演奏，感受音樂；最後就係有一個好嘅導師。
所謂一理通、百理明，郎朗所講嘅秘訣其實放諸四海皆準，只要大家能做到佢所講嘅，成功自然就會來臨。