政情：經濟動力晒冷 宣戰味濃
經濟動力同自由黨近年來猶如「貼錯門神」，不時隔空過招，經濟動力尋日突然平地一聲雷，喺自由黨榮譽主席田北俊（田少）準備參選嘅新東根據地「晒冷」，至少七名區議員一字排開現身做騷，甚有向田少示威嘅味道。
經濟動力尋日喺大埔區舉行母親節活動，至少七名區議員一字排開出現，大部分係大埔區議員，最令人注目嘅係兩名前自由黨成員邱榮光同羅煌楓嘅出現，其中前者啱啱宣布退黨冇耐，估唔到咁快就過檔咗去經濟動力。
政圈盛傳有鄉事背景嘅邱榮光，會喺九月領軍出選新東，擺明要同田少搶票，邱榮光昨亦坦承正積極考慮參選。經濟動力召集人林健鋒否認搞今次活動係同任何人打對台，強調佢哋只係為香港做嘢喎，真係好難令人相信囉！