政情：許曉暉咪定書做局長
候任特首梁振英（CY）嘅新政府新設文化局局長，原先兩名熱門人選黃英琦同馬逢國因不同原因甩轆，政圈盛傳「替補」人選係現任民政事務局副局長許曉暉（Florence）。Florence尋日出席一項母親節活動時冇正面回應傳聞，但談及香港文化政策時內容竟與CY嘅提議有九成相似，睇嚟佢早已熟讀CY政綱，為日後工作做好準備。
CY喺文化政綱中開宗明義話，文化政策其中一個目標係推動文化藝術同文化產業發展，鼓勵市場參與，凝聚社會力量同民間合作。Florence尋日談及推動文化工作嘅心得時，同CY嘅文化政綱不謀而合，佢相信透過政府、民間、學界同商界合作，共同凝聚大家對文化嘅熱誠，自能進一步推展文化工作。
至於盛傳係下屆教育局局長嘅考評局主席吳克儉，尋日接受傳媒查詢時幾乎間接默認「入閣」。吳克儉話，教育局局長係好重要嘅崗位，有好大挑戰，如果能夠參與會深感榮幸，但現階段仲有一啲程序要通過及考慮，同正式宣布將出任局長冇乜大分別。盛傳將出任房屋規劃地政局長嘅行政會議成員張炳良，尋日出席公開場合時就唔評論有關消息。