政情：拉布三人組 想拖泛民落水
由「拉布三人組」人民力量黃毓民、陳偉業同社民連梁國雄發動嘅立會拉布運動，連續兩個禮拜成功引發流會，疑似被拉布戰軟禁喺會議廳嘅建制派議員，前日終於按捺不住，密謀以通宵開會打消耗戰「剪布」。黃毓民自知已經年過半百，一旦連續多日通宵開會佢實捱唔住，尋日發出增援訊號，意圖拉埋其他早已決定杯葛離場嘅泛民主派落水，陪佢一齊扮溫總講典故拉布。不過其他泛民似乎無意和應，以免進一步得罪選民同納稅人。
體力有限 最多頂兩晚
毓民尋日出席一項活動時話，建制派要打消耗戰，先決條件係集齊卅人通宵坐喺會議廳防止流會，難度都唔可以話冇，但假若建制派號召成功，以十敵一，拉布三人組就好蝕底喇！事關得佢哋三個人輪流發言拉布，體力始終有限，估計捱到兩晚通頂已經係極限，所以點名要有份參與同支持「五區公投」嘅公民黨及工黨，以至民主黨同民協等反對「公投」嘅泛民幫手拉布。
毓民擺明要拉泛民落水，泛民就似乎唔想再蹚呢渾水。被點名嘅公民黨黨魁梁家傑婉拒話，拉布拉到盡頭都係表決，不如勸政府提出終止辯論算喇，何苦再「虐待」班建制派議員呢？民主黨張文光亦講明唔會落番場，因為佢哋早就決定唔會就千三項修訂發言，而且當初又係人民力量呼籲泛民離場，依家又叫人返入場，咁點得呢？
工黨主席李卓人雖然冇一口拒絕，但就話當初泛民決定離場，原意就係向建制派施壓，要死撐出缺安排嘅建制派喺會議廳「罰坐」，如果泛民走番入場，就會失卻呢個懲罰建制派嘅原意咯，所以要諗一諗先，似乎亦好有保留喎。
為選舉 泛民明哲保身
泛民有咁嘅反應其實並唔出奇，尋日我哋都講過，今次拉布運動中，前年政改一役走溫和路線嘅民主黨，本來贏得唔少選民認同，有乜理由走番舊路行激進呢？即使有份搞「公投」嘅公民黨，經過區議會選舉慘敗後亦經一事、長一智，知道激進路線唔啱佢哋行，所以做番一次明智決定。加上民意對拉布即使唔一面倒反感，亦係反對多於支持，選舉臨近，無論今次拉布背後有幾崇高嘅理念，都要明哲保身呀！