中環出更：恒生新一姐 「別問」快閃
前日恒生副董事長兼行政總裁梁高美懿正式退任，「一姐」位置由同系嘅滙豐大將李慧敏（Rose）接棒。尋日沙田馬場舉行主席盃賽，其中一場邀請咗Rose做頒獎嘉賓。呢位恒生「新一姐」似乎仲未適應到鎂光燈嘅照耀，面對記者提問即尷尬「快閃」，同前一姐梁太嘅大方態度迥異，睇嚟Rose要向梁太好好學習吓喇。
尋日Rose同丈夫前電盈副主席袁天凡十指緊扣，低調現身馬場擔任嘉賓。卓妮上前祝賀佢「升呢」做恒生一姐，佢即甜笑展露迷人酒窩。不過當卓妮問佢上任後有咩大計？會唔會覺得有壓力？佢即忸怩咁匿喺丈夫身後，笑稱「遲啲先同你哋講！」然後同丈夫急步離開。唔知Rose係咪啱啱先由滙豐過檔恒生，一時未熟習新環境同新崗位呢？