中環出更：母親節禮物 范太難忘收肥豬
母親節又到，為人子女係時候要有啲表示。尋日卓妮喺沙田馬場遇到全國人大常委范徐麗泰，佢同囝囝范駿華（Andrew）齊齊入場，為愛駒「自成一格」打氣。范太預告，今日將會同仔女撐枱腳慶祝，問佢以往收過啲乜嘢難忘嘅母親節禮物，佢自爆Andrew曾送一幅阿虫畫嘅《大智若愚》畀佢，幅畫入面仲有隻肥豬，笑言阿仔想笑佢似豬喎！
正所謂物輕情意重，范太話仔女買禮物畀佢，通常都會揀啲得意但唔會貴嘅物品。好似囡囡范凌華試過買咗支試管形嘅小擺設，入面裝住「家庭和睦」紙條，雖然所費無幾，但佢都覺得好窩心。嚟緊暑假，范太打算同姑仔坐郵輪去黑海度假七天，佢話未去過黑海，點都要去一次喎。
兩「大王」同地點慶祝
「快勞夾大王」杜振源（Simon）同「造紙大王」李運強兩對夫婦，尋日都有到馬場湊熱鬧，今日仲會不約而同到「富豪飯堂」福臨門慶祝母親節。Simon話，佢哋一家好重視母親節，每年必定慶祝一番，仔女仲會送花冧媽咪添。身邊嘅杜太甜笑住回應，仔女孝順已經係最大禮物喇！李太就話，仔女愛送首飾同靚衫畀佢，佢亦好鍾意着住仔女送嘅衫，感覺就好似仔女經常喺身邊一樣。
卓妮仲見到保良局副主席鄭錦鐘（Eric）同太太拍住拖入馬場，佢話今日母親節會好忙，皆因一人要分演兩角，中午同仔女及太太食飯，夜晚就要做番個乖仔，陪媽媽食飯，不過只要媽媽開心，幾忙都值得嘅！
卓妮