犯東方者必誅　正義傳媒必勝

有人認為網絡世界係一個犯罪世界，乜都講得，乜都做得，因為網民係隱形嘅。查實呢一個觀念大錯特錯，刻意發放誹謗文章中傷東方者，一定會受到懲罰！

呢嗱嗱嗱，揪出誹謗網民同幕後黑手嘅神聖任務又有新進展嘞。《明報》母公司世界華文媒體有限公司旗下《亞洲週刊》，喺「明報網站」有一個「亞洲週刊討論區」，○六年出現誹謗東方嘅貼文，係一個自稱「轉載」嘅互聯網使用者所為。東方報業集團聲譽受損，當然據理力爭討公道啦，於是透過法律程序先向《亞洲週刊》興訟，成功取得網絡通訊位址，然後再要求一間網絡供應商提供「轉載」嘅個人資料。高等法院尋日批准東方嘅要求，下令網絡供應商十四日內披露「轉載」嘅全名、身份證號碼、手機號碼以及地址。換言之，呢個含血噴人嘅誹謗者即將原形畢露，法律制裁指日可待！

喂，香港係一個法治之區，言論自由唔代表噏得就噏，高等法院批准東方索取誹謗者嘅個人資料，即係法官都認為惡意中傷係不可接受嘅行為啦。

事實上，東方追緝誹謗者已經有唔少成功例子，早前入稟控告「獨立媒體」網站兩篇分別登於○七同○九年嘅文章誹謗，原訟庭裁定東方勝訴，被告除咗要向東方賠償十萬元以及支付東方訟費，仲要提供兩篇文章發布人嘅個人資料。另外，東方之前亦已成功揪出多名發放誹謗貼文嘅高登網民，佢哋分別喺《東方日報》、《太陽報》同on.cc刊登道歉啟事，有人更加要賠償添。

一次又一次緝兇行動話畀大家知，即使追討費用不菲，東方討公道絕不放棄。金猴奮起千鈞棒，妖魔鬼怪冇碇匿，正義傳媒必會繼續追緝其他誹謗者以及幕後黑手，誓要牛鬼蛇神付出沉重代價！

之不過咁，有一個問題都幾激氣，流傳全球嘅誹謗東方貼文多達八百幾篇，當中超過七百篇竟然出現於中國網站。正如港區全國政協委員劉夢熊話齋，內地執法部門視若無睹，有法不執，簡直係縱容犯法。政協委員陳玉書亦話，內地網站出現涉及誹謗東方嘅言論，政府應該加以規管。

點都好啦，天網恢恢，疏而不漏。唔理幕後黑手幾咁陰毒，犯東方者必誅，正義傳媒必勝，掃除一切害人蟲，全無敵！