講錯嘢卻死不悔改嘅警務處處長曾偉雄，死都要為佢嘅「黑影論」及「卡手論」撐到底。之不過，從法、理、情上稍作分析，根本不堪一擊，議員話佢係「禿鷹淪為死雞，响度撐飯蓋」！
其實，三歲細路哥都知，講咗就講咗，但係講錯就要認，點可以話只要向前看，收番係不切實際！禿鷹睇嚟未受過教育，否則怎會無賴兼野蠻至呢個程度？你根據手上已知資料，認為「真誠可信」就照讀，好喇！你無腦唔識判斷事實、分析真相都算喇，如今，監警會都指出你有錯，咁就應該知錯能改，向傳媒朋友講聲「鎖你」，而不是死撐！講真，如果老朽根據「手上資料」，話你變性無能，曾練「葵花寶典」，咁老朽係唔係「講咗就係講咗，所謂收番係不切實際」呢？如果係，天下再無是非，人間再沒有真理矣！
禿鷹曾偉雄，「硬頸」唔等於硬道理，如果一句「向前看」就可以把責任推出去，咁自己任何衰嘢錯事，都可以忘記它唔需上身，多咗啲咁嘅人形物體，個社會係冇希望架！國家係會亡國架！點解？「天下興亡，匹夫無責」！講咗就係講咗，收番係不切實際囉！曾偉雄，你唔係從事藝術，藝術家通常「獨特偏見」、「一意孤行」，如徐悲鴻、艾未未係可以令多數人接受嘅，而你係紀律部隊，做錯嘢死撐，以後啲手下做錯事，一個二個向前看，講咗就講咗，吹咩！再冇「鎖你，Sir」，香港死得喇！