探射燈：漁署限三處攞水 玩殘魚販
新界魚販千里「撲水」！政府近年禁止擅自在海岸邊抽取海水養魚，並推行「優質海水認可計劃」，訂立優質海水供應點。惟該計劃推行約六年並於去年結束後，至今只有三個分別位於港島及九龍的優質海水認證點。正因漁農自然護理署的「虎頭蛇尾」，令新界魚販為取「靚」海水養魚，每日竟要花上數個小時遠赴港九，令成本激增，市民買魚變相要多「交水費」。商戶滿以為去年在屯門青山新落成的魚類批發市場會有供水點，豈料卻好夢成空，只有發起簽名運動，力爭到底。
「唉，究竟點解想有水養魚，都要去到冇雷公咁遠？」甫走進元朗大橋街市，魚販麗姐立即向記者訴苦，其他魚販亦齊聲和應。為保魚檔鹹水魚新鮮生猛，商戶原來別有一番辛酸，「真係要幫我哋反映吓，為咗拎啲靚海水嚟養魚賣畀啲客，日日都要山長水遠去香港仔拎水！」
「成日趕唔切 試過去到冇水」
油價高企，魚檔買手王先生透露，去香港仔魚類批發市場取水，來回油費高逾五百元。相較每公噸只售約三十元的潔淨海水，可謂「妹仔大過主人婆」。記者日前夥同屯門新墟街市協進會主席鄭樹基親歷取水過程，發現來回約需三個小時，路程逾八十五公里。
鄭表示除香港仔外，行家亦會光顧長沙灣及觀塘魚類批發市場水站，「我去過長沙灣，但係試過去到冇水，最後都係要返香港仔。」另一名資深魚販則指，較常到觀塘取水，「不過唔好以為好近，一程又係要個幾鐘，我哋買完魚趕去觀塘，都成日趕唔切，嗰邊隨時閂咗門！」
千里求水，全因現時本港只有上述三個地方取得○五年展開的優質海水計劃認可，海鮮商戶可合法地以成本價取得潔淨海水。然而，現時屯門青山亦設有魚類批發市場，為何未能提供優質海水予新界區魚販？
「青山批發市場舊年開幕，一開始大家都覺得唔起供水站喺舊嘅臨時市場係合理，諗住起喺新嗰個（市場）。」屯門區區議員陳樹英與不少魚販均滿心期待新市場會有適當設施，滿足大眾所需。除便利商戶外，她亦認為在新市場供應海水，可為該處帶來新機遇，一舉兩得。
「感覺政府唔理呢邊魚販」
但新市場於去年五月開幕，該計劃卻已於去年一月「圓滿」結束。「梗係覺得奇怪啦，個感覺就好似係政府唔理我哋呢邊啲魚販咁！」鄭樹基坦言，新界西的「災情」最為嚴重，至少有近十個街市的魚販受影響。
事實上，除取水外，魚販亦可使用海鹽混和淡水，轉化成人造海水養魚，但鄭坦言成本太高，魚產的質素亦成疑，「用人造海水，魚都快死啲！」他早前發起聯署爭取設立海水供應站行動，瞬間已獲數十個簽名支持，「除咗成本問題，都希望畀到又平又靚嘅海鮮畀市民，等佢哋有信心！」
海水供應站乃必備配套
香港海鮮業聯合總會主席李彩華直指，海水供應站對魚市場來說，儼如必備配套，「絕對應該有，你收得（魚販）租，就應提供畀佢哋。」李認同如能在屯門加設供水站，該區魚商、食肆、以至市民均可受惠。
漁農自然護理署發言人表示，早前接獲屯門區內海鮮商戶及區議員反映，要求魚類統營處在青山批發市場供應潔淨海水的意見，處方正積極考慮並研究可行性。
圖：吳啟偉、關萬亨／文：陳偉豪