政情：雷賢達愛心湯水慰CY
候任特首梁振英（CY）喺競選期間面向七百萬市民，走遍十八區同市民零距離接觸，少不免因公忘私會無啖好食。據聞當時競選辦中人都好關心CY嘅飲食狀況，不過咪以為照顧男士三餐係女士嘅專利，原來最着緊CY嘅飲食係有「基金教父」之稱嘅雷賢達（David），佢絕對稱得上係CY背後其中一個重要嘅男人。
CY喺上月下旬舉行答謝大會時，自爆喺競選期間成日要喺座駕度食咖喱魚蛋同元朗白糖糕做晚餐，據聞競選辦中人見到CY食無定時好心痛，不時提醒CY要注意身體，期間David更加對CY愛護有加，見CY太忙會主動買個飯盒畀佢食，有時仲會靜雞雞用保暖壺留啲湯水畀CY飲，CY飲完後又會換另一個保暖壺畀佢，認真細心。
事實上，CY同David惺惺相惜並非源於競選期間。據聞寫開專欄嘅David，不時將作品用電郵傳畀啲朋友收集意見，每次首個回應者幾乎都係CY，而且都係言之有物，並非只係交行貨話收到多謝。一點一滴，都令David印象深刻。