政情：真假梁粉搶攻立會
九月立法會選舉硝煙四起，支持梁振英（CY）嘅真「梁粉」密謀搶攻功能界別，為CY日後嘅有效施政鳴鑼開路，當中挺梁「親兵」好似餐飲聯業協會會長黃家和自然係首選人物，一班傳統左派亦有意以疑似「梁粉」身份，睇準時機齊齊搶灘參選，到時心口掛住「齊心」嘅真假「梁粉」齊集立法會，相信新組成嘅功能界別勢必會有一番新景象。
功能界別傳統係工商界嘅橋頭堡，歷年來協調參選為主罕有內訌，但據聞呢個表面和諧嘅情況今年出現新局面，多名「梁粉」已磨拳擦掌為參選做好準備，其中被視為挺梁中堅分子嘅黃家和更加係皇帝女唔憂嫁，可以循飲食界同廠商會二揀一出選。
重點取代四大懶蟲
有親中消息話，西環基本上已開綠燈予黃家和參選飲食界同現任業界代表、自由黨張宇人公平競爭，有高人仲分析黃、張嘅勝算係六四比，不過唯一變數係廠商會有呼聲想黃家和循工業界（第二）參選，取代「深唐」嘅林大輝，究竟黃家和最後情歸何處相信好快揭盅。
「四大懶蟲」嘅議席亦係疑似「梁粉」重點出擊嘅據點。消息話，傳統左派同有中資背景嘅社會人士一直好想更上層樓，只係過往一直苦無機會，適逢CY當選主政需要喺立法會有穩定票源支持，於是有傳統左派向西環自動請纓成為CY最可靠嘅盟友。
有消息指，最近再次畀人勸退嘅中總代表黃宜弘，據聞好大機會由本身係律師嘅港區人大代表廖長江接棒；金融界嘅李國寶則很大機會會畀曾為臨立會議員、中銀高層吳亮星取代；至於體育界嘅霍震霆亦罕有受到挑戰，對手係疑似文化局局長、港區人大代表馬逢國。
另有消息更指，有政壇高人為咗擴大親中勢力嘅版圖，連旅遊界謝偉俊轉戰九東後出現嘅空缺都唔放過，正發揮影響力想力邀中旅高層盧瑞安「出山」參選，但一切仍有待盧首肯。但無論結果如何，真假「梁粉」全部蒲頭嘅格局已成，未來四年勢必成為一股不可忽視嘅新勢力。