中環出更：郭少明換慳電膽抗加費
中電「發惡」，宣布在未來四年加四成電費，市民叫苦連天，做生意嘅都要諗諗對策。卓妮前晚喺跑馬地馬場見到莎莎國際老闆郭少明（Simon）同太太郭羅桂珍孖住入馬場，Simon坦言電費加價對公司影響頗大，但打開舖頭做生意，電又唔可以唔用，惟有逐步更換慳電膽，慳得幾多得幾多喎！
史立德批中電「大咬咗啲」
要慳電，仲有其他辦法嘅，從事印刷生意嘅華彩集團主席史立德（Allen）喺內地設廠，應該慳番唔少租金同電費。雖然Allen冇受中電加價影響，不過佢都覺得中電今次係「大咬咗啲」。佢話，中電作為上市公司，要做啲業績向股東交代係無可厚非，但都唔應該加咁多，建議最多加一成，與通脹掛鈎就足夠喇。
Allen近期財氣旺，前晚嘅馬場賽事，佢同太太史顏景蓮與囝囝史昊洛匹愛駒「叻先生」由頭帶到尾跑出，將三十八萬幾元獎金袋袋平安，Allen一家開心到飛起。