中環出更：陳志豪拜師一哥 變身鮑魚王子
以「阿一鮑魚」名聞天下嘅富臨飯店老細楊貫一，門徒遍布全球各地。八十高齡嘅一哥，最近又收多咗一名入室弟子，佢就係富臨股東之一陳家公子陳志豪（Eric）。Eric擇吉日喺尖沙咀國際廣場嘅阿一海景飯店斟茶拜師，成為世界級御廚嘅入室弟子，父母及太太Peggy梗要齊現身，分享開心時刻。
唔講唔知，一哥嘅徒弟有二百幾個咁多，遍布美加、東南亞及中港台，中台都有真假難辨嘅「鮑魚公主」，Eric高大靚仔，大有潛質成為香港版「鮑魚王子」。
第「268」號徒弟
跳過唔吉利嘅數字，Eric獲頒嘅證書係二百六十八號，認真好意頭。一哥笑稱，若加埋冒認嘅徒子徒孫，唔止呢個數添！
Eric唔係一般弟子咁簡單，事關佢父母入股富臨逾三十年，而阿一海景飯店嘅兩大股東就係一哥及陳家，所以Eric仲背負繼承衣鉢、省靚阿一金漆招牌嘅重任。難怪師傅當日教路第一件事，就係待客要真誠、唔好怕醜等行政管理秘訣，至於入廚整鮑魚等基本功，慢慢嚟就得喇！
Eric三年前入行負責睇住阿一海景及已執笠嘅八重菊日本菜（現已改為意大利餐廳SORRISO），平時都識炮製煎牛扒、焗蛋糕等西餐，如果再學埋一哥嘅真功夫，太太Peggy就認真有口福喇！
卓妮