課本負擔沉重，家長叫苦連天，點算好呢？教育局話得得得，等政府同書商研究研究，睇下有乜奇謀妙計降低書價。一年嘞，兩年嘞，三年嘞，唔知過咗幾多年嘞，官老爺拍心口應承嘅得得得，變咗書商賺到盡嘅加加加，課本仍然年年加價，家長激到吹鬚睩眼！
教育局局長孫明揚話喎，局方去年向書商提出，用一年時間進行教材分拆以期降低書價，但至今效果並不理想，只有小部分達到目標，孫公認為分拆進度同價錢減幅都難以令人滿意。
既然促使書商減價嘅計劃咁失敗，課本市場繼續嚴重扭曲，係唔係應該諗諗其他辦法呀？一向以拆彈專家自居嘅孫明揚眉頭一皺，計上心頭。孫公拍拍心口又話嘞，教育局計劃向立法會申請五千萬元撥款，資助大學同非牟利機構研發電子教科書，預計今年第二季接受申請，二○一四年可推出市場，相信電子教科書能夠提供更加優良以及價錢合理嘅課本。
孫局長引述顧問研究表示，電子教科書嘅開發成本比印刷版本便宜兩成，如果全港有三成學校採用，生產成本可進一步下降至印刷版本嘅一半。政府資助開發電子教科書嘅機構，每個科目可獲相當於開發成本一半或最多四百萬元資助。開發機構必須向指定學校同圖書館免費提供電子教科書，合約期內不能自行加價。
咦，聽落都不失為一個好方法喎，利用電子課本讀書識字即係無紙作業啦，自然節省好多紙張油墨嘅印刷成本，售價理論上一定唔會太貴。無紙作業仲符合環保之道添，唔使斬咁多樹造紙吖嘛。之不過咁，功夫茶有兩個問題。首先，現屆政府只係剩低兩個月貨仔，時間短成咁，電子教科書計劃有冇可持續發展嘅空間㗎？你知啦，人一走，茶就涼，萬一孫明揚拍拍屁股退休養病安享晚年，下屆政府唔聽你支笛，電子教科書胎死腹中好肉酸啫。
第二個問題就係，即使下屆政府蕭規曹隨，電子教科書成功推出市場嘅機會有幾大？之所以要咁問，無他嘅，教育局往績太差，過去幾年搞來搞去都搞唔掂書商，課本價格一直居高不下。話就話電子課本係另闢蹊徑，企圖打破書商綑綁式銷售陋習，問題係任何奇謀妙計落於笨蛋手上，都會變成亂七八糟一鑊粥。既然教育局幾年以來都冇能力促使書商減價，開發電子課本會唔會又係一個意願良好但無法實現嘅空中樓閣？
不如咁講啦，新官上任三把火，惟有盼望下屆政府落手落腳執拾爛攤子，唔好任得電子課本計劃虎頭蛇尾。