政情：IT豪最驚魔童挑戰
立法會選舉就到，資訊及科技界譚偉豪自知上屆贏得險，今屆一早開始約見唔同業界團體爭取連任。外界一直以為佢最大對手係泛民莫乃光，但原來IT豪最驚反而係電訊魔童王維基，事關魔童去年選委會選舉都有成千幾票，一旦參選勢必扯散IT豪票源，令泛民莫乃光偷雞得米。
早前傳出互聯網專業協會（iProA）會長鄧淑明（Winnie）有意出戰立法會，但有業界人士分析佢出選機會不大。反而魔童王維基就未必聽阿爺支笛，有力挑戰。不過IT豪可以放心，因為我哋問過王維基，佢透過秘書話畀我哋知，現階段打算集中火力搞免費電視，唔會參選立法會。
外界傳IT豪入新民黨，佢自己就話唔會咁快決定住，會等到真係連任至算喎。不過我哋就知佢遲啲會跟新民黨主席葉劉淑儀一齊去上海考察，唔知到時會唔會有密偈傾呢？