政情：醫局玩肥胡 撐二次創作
「網絡廿三條」鬧得全城熱烘烘，估唔到連醫院管理局都撐二次創作，惡搞主席胡定旭（肥胡）同行政總裁梁栢賢（PY）做荷里活大電影《拆彈雄心》嘅主角，比喻兩位「英雄」面對醫療事故頻頻以至人手問題都要拆彈咁拆。肥胡就詩興大發，現場登時瀰漫住離愁別緒。
尋日醫管局晨咁早開二○一二年度研討大會，PY致開幕辭嘅時候不忘講吓笑，等台下啲觀眾醒神啲。一講到風險管理嘅時候，顯示屏即時彈出《拆彈雄心》海報，仔細啲望吓，原來係肥胡同PY着晒成身防護衣扮拆彈專家，搞到全場起哄。睇嚟醫管局都明撐二次創作喎！
做埋呢屆主席就卸任嘅肥胡臨別仲吟詩，佢引用美國作家傑克‧倫敦（Jack London）嘅信條鼓勵醫管局成員：「寧化飛灰，不作浮塵。寧投熊熊烈火，光盡而滅。不伴寂寂朽木，默然同腐……」講到咁壯烈，其實佢任期去到今年十一月底，使唔使咁早吟定詩呀？