政情：林D9譚志源五段恩情
去年，林瑞麟（林D9）由政制及內地事務局局長升做政務司司長，拋低一個替補機制畀下手。不過當日接到呢個燙手山芋嘅政制及內地事務局局長譚志源（Raymond）尋日喺一個電台訪問中，就對呢位上手有讚無彈。Raymond話，雖然佢只係接任做咗七個月局長，但已感受到呢個「家嫂」角色並唔易做，可想而知林D9是有如何高嘅統籌能力，以及團隊精神，簡直係備受政務官行列尊崇。咁令人骨痹嘅評語，連Raymond自己都承認帶有豐富嘅個人主觀色彩，即係廣大市民未必會認同。不過Raymond仲話林D9係一位有情義嘅上司，點解佢會知？因為林D9五度做佢上司。
Raymond同林D9嘅相遇，要數番去十五年前九七回歸。喺呢個政權交接嘅重要年頭，加入政府十年嘅Raymond喺移交儀式統籌處首遇當時任處長嘅林D9。之後Raymond轉去做財政司司長梁錦松新聞秘書，林D9當時係新聞統籌專員，亦算係Raymond半個上司，可惜時任財政司司長因偷步買車落台，Raymond一度疑因無「提醒」老細，搞到無人肯收留，好彩林D9邀請佢加入當時嘅政制局做首席助理秘書長，跟佢推銷○五年嘅政改方案，林D9第三度成為Raymond上司。三年後，Raymond再次獲林D9提拔，出任政制局副局長，第四度成為林D9嘅下屬。去年林D9升官，Raymond接替林D9做政制及內地事務局局長，第五度做林D9下屬。
無縫交接 譚應可留任
對於林D9唔做官去牛津讀神學，本身都係基督徒嘅Raymond就話唔覺得出奇，因為佢近年都發現林D9嘅信仰成長多咗，至少遇到棘手問題時識得祈禱，交託畀神，佢仲叫林D9要忘記背後，努力面前，向着標竿直跑，面對未知前路更加要有信心。
至於Raymond自己，佢依家一定係向着標竿怒跑，事關佢尋日同候任特首辦主管羅范椒芬示範「無縫交接」，二人一早夾好以紫色裝扮出席電台節目解釋新政府架構重組，似乎佢留低應該係無問題嘅！