政情：中環出更：董吳玲玲 陳李妮翡翠繫友誼
帝皇翡翠行政總裁董吳玲玲經常親身演繹自家設計靚翡翠，貴氣形象深入民心。日前佢喺中環一間酒店舉辦春季珠寶展，盡騷翡翠珍藏及設計，吸引城中一眾名媛及政商老友嚟撐場。卓妮咁貪靚，梗要去趁熱鬧，見到情迷翡翠嘅博愛醫院副主席陳李妮（Lily）都喺度，家中不乏翡翠鑽戒、耳環嘅Lily話，仲欠缺一條高貴、有特色嘅頸鏈，所以特登嚟尋寶。
曾任仁濟醫院主席嘅董太同Lily因做善事而結緣，又係翡翠嘅愛好者，無論講善事或扮靚心得都咁啱Key。Lily睇到滿室靚絕翡翠，笑稱暈得一陣陣，期間對一條售價六十八萬元、由渾圓紅綠玉石串成嘅珠鏈愛不釋手，笑笑口話要努力工作賺錢至得。其實Lily施展冧功，氹老公送畀佢咪得囉！
董太囝囝董必政都喺度，佢同Lily都好啱傾，事關兩人都熱愛潛水，Lily仲介紹佢去老公家鄉馬來西亞嘅潛水勝地去體驗添！
董太無價之寶搶眼
卓妮見董太左手腕間戴住一隻雕工精細、貴氣逼人嘅手鐲，上面雕琢咗寓意平安長壽嘅牡丹花、壽桃及如意，一睇就知價值非凡。董太笑稱，有朋友同佢問價，佢都話係無價之寶，事關幾多錢都唔會賣，若果賣咗出去就搵唔番喇！
卓妮