最低工資時薪二十八元都實施咗一年嘞，大家有冇發覺一個現象？呢一個現象都相當耐人尋味㗎，就係今年五一勞動節上街遊行示威嘅人數，比起舊年仲要多！
照道理講，人工加到至少每粒鐘廿八蚊，草根階層嘅生活質素應該提高喎，怨氣應該減少至啱，點解示威人數反而多咗嘅呢？答案其實係咁，人工雖然高咗，不過通脹加劇，實際得益被通脹呢一隻怪獸蠶食咗一大截。樂施會做過一個調查，現行最低工資水平喺二○一○年十一月提出，由當時到今年二月，香港嘅累積通脹率高達百分之七點三五，抵銷咗超過七成嘅薪酬升幅。樂施會就話嘞，要保持原來時薪二十八元嘅購買力，今日嘅最低工資水平至少要三十元一角。
事實上，最低工資委員會正在諮詢第二個最低工資水平，五月二十八日完成諮詢，預料七至八月開始討論新嘅水平。委員會文件顯示，勞工界普遍建議新嘅最低工資水平不低於三十三元，部分建議三十五元，不過商會同僱主代表普遍建議維持二十八元。
究竟最低工資水平應唔應該調高呢？如果調高，又調高幾多至合理呢？東方報業民意調查顯示，勞工界訴求由二十八元加至三十三元，三成七受訪者擔心如果加幅太大會形成惡性循環；三成二認為最低工資並非抵抗通脹嘅唯一方法；兩成贊成加至三十三元；百分之九憂慮會加劇有工冇人做嘅情況。
因乜事幹有工冇人做？即係咁，擔擔抬抬又係時薪廿八蚊，行行企企都係時薪廿八蚊，正常人都唔想投身大量出賣勞力嘅工種啦，好似洗碗洗碟咁，人手非常短缺㗎！
至於五一勞動節遊行人數今年更比舊年多嘅問題，三成八受訪者認為高通脹令到生活冇實質改善；兩成九覺得貧富懸殊仍然嚴重；兩成七表示打工仔未能分享經濟成果。
講來講去都係特區政府冇鬼用，搞到最低工資變咗食之無味、棄之可惜嘅雞肋。你知啦，只要經濟好，個個人工高，可惜呢一個由曾蔭權領導嘅政府始終識講唔識做，乜鬼嘢優勢產業都係紙上談兵。
東方報業民意調查顯示，大部分受訪者不滿曾蔭權上任七年以來，勞工權益政策除咗最低工資之外乜都冇。三成八批評官方政策只向財團傾斜；兩成六直斥煲呔曾交白卷，施政一事無成；兩成二認為曾蔭權無能。
計功夫茶話齋，檢討最低工資水平必須小心謹慎，千祈唔好造成得不償失嘅反效果。至於未來特首梁振英，麻煩閣下吸取曾蔭權無能而治嘅教訓，諗辦法改善打工仔生計啦，唔該！