話說「曾蔭權敗走澳門江湖派對」令「江湖」一詞熱爆，內地四大名牌學府在港面試考生，其中一條問題要考生把「江湖」譯為英文，令考生搔爆頭。
本報請名人點解「江湖」一詞，做得最全面，版面最活潑，值得一讚。「江湖」呢兩個字，其實相當迷人，「我不在江湖，江湖卻有我的傳說」——國內導演陳凱歌呢兩句話曾入選二○○五年大陸最經典語錄。呢兩句話夠經典，對於即將下台的貪曾，即將遠赴牛津讀神學嘅林公公，就可以變成「我不在官場，官場卻有我的傳說」；當然，佢哋兩位嘅傳說，絕對唔會係古時遊俠「重義輕生一劍知」嘅情懷，皆因一個貪到不知有白天與黑夜，一個做咗人肉錄音機咁多年，好應該接受神靈嘅洗禮，校番正啲Key！
現實嘅江湖並不可愛，如果唔係，啲官商、政客、名人就毋須聞「江湖」而色變。「江湖」兩字，在詩人墨客筆下倒惹人遐思。黃庭堅：桃李春風一杯酒，江湖夜雨十年燈；范仲淹：居廟堂之高，則憂其民；處江湖之遠，則憂其君；杜甫：鴻雁幾時到，江湖秋水多；杜牧：落魄江湖載酒行，楚腰纖細掌中輕；惆悵江湖釣竿手，卻遮西日向長安；李商隱：永憶江湖歸白髮，欲回天地入扁舟。
撇開黑社會嘅「江湖恩怨」，江湖顯然有其可愛的一面。對於「江湖」，黃秋生引莊子所說，最能道盡「江湖」一詞的文化真義，明天續談。