政情：黃成智死撐 銜頭如浮雲
本報○九年獨家踢爆民主黨立法會議員黃成智因為以「無牌社工」身份，虛報自己係註冊社工參選○八年立法會選舉，最後被社會工作者註冊局停牌半年。註冊局最近批番個牌畀佢，嚟緊嘅新一屆立法會選舉佢終於可以用番註冊社工身份，但佢就死撐話呢個專業資格用唔用都唔重要。
黃成智○七年七月至○九年四月聲稱因為唔得閒所以無續到註冊社工個牌，到○九年先得閒去續番，但佢就衰在喺○八年自己「無牌」期間，用咗「註冊社工」呢個銜頭去參選，搞到畀兩個註冊社工投訴，註冊局紀律委員會裁定投訴成立，判佢停牌半年。
黃成智個停牌期由舊年三月底執行，原本到舊年九月底就停完，但註冊局上個禮拜先通知畀佢續番一年期。佢就話因之前搞區議會選舉好忙，早兩個月先得閒申請番個註冊，終於有番呢個專業資格。
嚟緊又有新一屆立法會選舉，佢就話未諗係咪用註冊社工身份參選，又話呢個身份只係凸顯佢嘅專業資格，用唔用都唔重要，有需要先同市民交代喎。