政情：絕食騷抽水 白鴿懶辛苦
港鐵根據可加可減機制年年票價有加冇減，仲要事故頻生，令全港市民憤怒。各黨各派都藉住呢啲同民生密切相關嘅議題爭取民意。白鴿黨呢兩日就發起「絕食為民生，反對港鐵加價」行動，由佢哋幾個區議員分別喺全港各區絕食。咁啱幾個區議員就係計劃出選立法會嘅人選，有網民就揶揄佢哋係「輪流絕食」，仲話「如果四個鐘就叫絕食，香港日日都有人絕食」咁話。白鴿黨想「搭港鐵」成功爭取民意，邊有咁着數嘅事？
沒有犧牲 毫無效果
白鴿黨參與行動嘅有尹兆堅、單仲偕、胡志偉同陳樹英，正正就係白鴿黨九月出選立法會、但又唔係現任議員嘅名單︰尹兆堅出選超級區議會議席，單仲偕、胡志偉同陳樹英就分別出選港島、九龍東同新界西，佢哋今次分別喺番自己嘅地頭葵芳、柴灣、觀塘同荃灣絕食，真係做騷都求其過人，難怪有網民對佢哋嘅行動抱懷疑，仲誤會佢哋係輪流絕食添。
網民Tony Lam就話「呢個運動好特別，輪流絕食」。Kokkin Chan就揶揄「每人絕食四個鐘，真係陰功豬」，仲反建議佢哋「可唔可以進取啲，晚飯後絕食十小時」亦有網民唔畀面，直斥佢哋「純粹表現博上鏡，沒有任何犧牲，一丁點實際效果也沒有」。
我哋搵過胡志偉，佢就急急澄清，話佢哋嘅絕食行動絕對係貨真價實，好似佢自己就由前日朝早十一點絕食到尋日朝早十一點，足足廿四個鐘。胡志偉仲同我哋呻依家天氣熱，所以今次絕食仲辛苦過幾年前爭取真普選嘅絕食行動咁話。佢哋尋日結束絕食之後就遊行去港鐵總部，仲遞交咗喺街頭收集嘅二萬五千個市民簽名，反對加價。
絕食又好、遊行又好，街坊希望嘅只係佢哋真係做到嘢，而唔係淨係做騷。胡志偉就話已經收到風，港鐵會增加優惠，如果街坊都係唔收貨，佢哋就會有進一步行動喎。街坊嘅眼睛係雪亮嘅，如果佢哋以為用「食快餐」嘅方式，做下騷就贏得民意，咁就太天真喇。