中環出更：劉展灝細仔 讀政唔從政

事業為重 無懼做「盛男」

卓妮尋日喺沙田馬場見到Stanley，佢有份嘅兩隻團體馬「奪錶」及「無敵駿駒」同場出賽，大仔燊濤（Gary）夫婦同Ronald都入場幫爸爸打氣，認真孝順。Ronald自言好鍾意錶行嘅工作，仲向卓妮展示手上自家代理嘅名錶，做埋生招牌。現時仲係單身嘅Ronald，話唔擔心做「盛男」，皆因男士應該以事業為重喎！

Stanley就話，自從成家立室後，見父母嘅時間少咗，入馬場變成家庭聚會嘅指定動作。不過佢話今年六月開始要飛成都、北京同上海打理分店生意，尤其是成都係公司未來重點發展地，相信到時會更加忙喇。

尋日喺馬場，自由黨榮譽主席田北俊特別開心，田少上周日先拉完頭馬，尋日佢同太太隻「閃爍武士」再捧盃，帶挈田少穩袋五十一萬幾元，難怪佢心情靚爆。