中環出更：《帝女花》撻着陳文綺慧
東華主席陳文綺慧（Viola）上任個多月，籌款新招不斷，頭炮係搵嚟粵劇名伶蓋鳴暉，喺重開嘅新光戲院演出《香銷十二美人樓》。喺尋日嘅記者會上，Viola自爆係粵劇迷，一齣《帝女花》，令佢同粵劇「撻着」。
母親節折現唔送禮
東華尋日喺九龍灣MegaBox開記者會，預告六月七日晚有好戲上演。東華總理李鋈麟拍心口做粵劇晚會籌委會主席。原來，佢同Viola都係標準戲迷。Viola直言，起初好抗拒聽粵曲，直至近年媽咪學唱粵劇，耳濡目染下，做埋戲迷。
嚟緊母親節，佢都做廿四孝乖女，陪媽媽及奶奶食飯，至於禮物方面，佢話乜禮物都送過，都係折現最實際。身形本身就高挑嘅Viola，上任之後更瘦咗一圈，細問之下，原來係太忙之過，「靈芝大王」老公陳宇齡睇見都覺得肉赤，晚晚逼老婆食雪糕、紅豆沙，話要谷肥太太喎。
李鋈麟都與粵劇有緣，佢自爆小時候經常喺爸爸嘅雜貨店被迫聽粵曲，每次趁老竇走開送貨，就轉台聽「披頭四」，估唔到長大後反而成為戲迷，粵曲琅琅上口。
尋日嚟撐場嘅，仲有副主席馬陳家歡、總理陳蕙蘭、杜志輝及鄧明慧等。舖王鄧成波公子兼總理鄧耀邦（Jason）都現身。做咗兩任爸爸，Jason心知太太辛苦，已訂定大紮玫瑰花，母親節當日代兩個囡囡送花，認真sweet。
卓妮