醫生不足，護士不足，床位不足，香港千瘡百孔嘅醫療系統，到底有乜嘢係足夠嘅呢？答案係一個「忍」字，忍足了，忍夠了，忍無可忍了！
如果大家係忠實讀者，一定知道功夫茶最希望七月一日之後邊個高官冇得留低，當然就係嗰個成事不足、敗事有餘嘅食衞局局長周一嶽。喂，喺乜鬼都不足嘅情況之下，家陣再揭出另一個瘡疤，藥劑師人手不足。你話嘞，周一嶽嘅存在係咪徹頭徹尾阻住地球轉？
藥劑師嘅問題係咁嘅，醫管局初級藥劑師入職薪酬不及連鎖藥房吸引，加上人手流失，累積六十至八十個空缺，預計公立醫院青黃不接將會由醫護人員蔓延至藥劑職系。
呢嗱嗱嗱，問你驚未？周一嶽真係長期失職㗎，喺佢關人忍事嘅荒唐領導之下，醫管局永遠處於七個蓋冚十個煲嘅瘋狂狀態，如果唔係候任特首梁振英未上台先喝停雙非孕婦來港產子，睇怕香港嘅醫療系統好快就要崩潰，任何一個病人都有機會成為「壓死駱駝的最後一根稻草」。
所以話啫，千唔該萬唔該，新舊政府換屆之後，一定唔可以見到周周孭一鑊嘅周一鑊再坐一會，除非你唔介意全港七百萬市民嘅生老病死都搞到一塌糊塗。
講番藥劑師吖，公立醫院入職薪酬不及連鎖藥房吸引固然造成招聘困難，其實藥房工作嘅社區藥劑師都做到一肚氣，正在醞釀罷工。由香港執業藥劑師協會、香港西醫工會、香港視網膜病變協會以及病人互助組織四個團體組成嘅「藥物安全聯盟」，批評現時社區藥劑師註冊制度未能同國際標準與時並進。
本地藥劑師大學畢業之後，只要去到香港藥劑業及毒藥管理局實習一年，毋須考試即獲註冊藥劑師身份，反觀海外藥劑師如果要在港工作，必須通過管理局嘅考試，合格先至能夠執業。簡單咁講，本地藥劑師毋須考試可執業嘅做法有欠公平客觀，最終可能拉低業界水平，令市民失去信心。所以咯喎，社區藥劑師計劃罷工要求政府改革註冊制度。
大家聽完係咪覺得好搞笑？社區藥劑師主動希望通過考試提高業界水平，政府居然耍手擰頭喎，唔通周一嶽之流嘅黃綠醫官係要見到市民失去信心先至安樂？
藥劑師唔夠人手好危險㗎，人少就會忙，忙中就有錯，萬一配錯藥咯喎，病人隨時變死者。計功夫茶話齋，解決醫管局初級藥劑師入職薪酬問題其實唔難，事關食衞局局長嘅入職薪酬非常吸引，一旦換局長，一天都光晒！