政情：黃錢其濂暗寸「曾」貪婪
回歸前曾任衞生福利司嘅黃錢其濂尋日出席一個活動時大談自己即將出新書，教港人脫離港式英語，本來都好哋哋，但一講到下屆政府要注意廉潔時，佢即刻嬲到彈起，對現時貪污腐敗嘅風氣好睇唔過眼。
黃錢其濂話當年自己做高官，廉潔呢條底線絕對唔可以破壞，因為當年政府奉行高薪養廉，如果咁都仲要貪，真係好可惡。佢仲提到當年自己外訪，唔會住咩總統套房，盡量慳得就慳，費事畀市民感覺係高官貪到盡。黃錢其濂咁講，雖然無指名道姓，但好明顯係講緊曾蔭權，不滿現時有人做盡當年高官做唔出嘅事囉。
其實當年港英政府都無規定高官外訪要住咩規格酒店，但黃錢其濂就識從市民角度諗，唔似得煲呔曾咁，被踢爆後仲要扮無嘢，將所有責任推落市民身上，話係公眾期望過高。原來過咗二十年，世界進步緊，但煲呔曾就不進則退，好心佢自己閂埋門檢討吓啦。