政情：Ann蔣擬選九西定軍心
民建聯本月中舉行路向營後，突然爆出發展局政治助理張文韜「空降」九西出選，民建聯副主席李慧琼（Starry）轉戰區議會超級議席，此建議一出惹來黨內多個支部強烈反彈，為今之計，該黨變陣，派出有工商界背景嘅民建聯副主席蔣麗芸（Ann）落九西穩定軍心。
民建聯九龍城支部尋日搞咗個九西區巴士脫班調查記者會，盛傳會出戰九西嘅阿Ann同Starry「拍住上」，分工合作公布個調查結果，明眼人一睇就知想幫阿Ann落九西做嘢打響頭炮。阿Ann話，現時地區正在醞釀參選名單，又提到自己去年底嘅區議會選舉都有幫九西同新東嘅兄弟，當場九龍城區議會副主席潘國華即時和應，話阿Ann喺選舉時好幫手喎。
另外，立法會主席曾鈺成盛傳會喺港島區自組一人名單爭取連任。佢尋日出席活動時話，所有民建聯參選名單要由中委會決定批准，此前嘅任何傳聞揣測，意義不大。